Kongen i statsråd er den høgste utøvande styresmakta i Noreg. Ein person som møter i statsrådet blir kalla ein statsråd.
Med kongen i statsråd meiner vi regjeringa samla i møte leia av Kongen. Etter skikken vil alle saker som skal opp i statsråd vere diskutert på førehand ved ein regjeringskonferanse eller førebuande statsråd, som Kongen ikkje deltek i.
Når det i norske lover er vist til at Kongen kan avgjere ei sak, blir det til vanleg meint Kongen i statsråd. Men det hender òg at lova viser til Kongen personleg. Til dømes var det Kongen personleg som i 1968 gav kronprins Harald lov til å gifte seg med Sonja Haraldsen, jf. Grl. § 36, rett nok etter konsultasjonar med regjeringsmedlemane og leiande politikarar.
Grunnlova har reglar om statsråd i §§ 27-31. Dersom Kongen er utanlands eller sjuk, er det kronprinsen som leier statsrådet (§ 41), er han elles forhindra frå å møte, kan statsministeren leie statsrådet, som gjer vedtak i Kongens namn.
Vedtak fatta i statsråd vert kalla kongeleg resolusjon. Dersom kronprinsen leier møtet, brukar ein nemninga kronprinsregentens resolusjon.
Før Den norske kyrkja vart skild frå staten i 2012, vart relevante kyrkjesakar avgjorde i kyrkjeleg statsråd. Her møtte berre dei statsrådane som er medlem av Den norske kyrkja.
Kjelder
Knophs oversikt over Norges rett, 8. utg. Universitetsforlaget 1981 ISBN 82-00-05531-0
Kategori:Noreg