Johan Christian Viggo Ullmann () var ein norsk skulemann, embetsmann og stortingsmann for Venstre.

Liv og virke Ullmann var fødd i Christiania. Far hans, den danskfødde Jørgen Nicolai Axel Ullmann, var tilsett i Revisjonsdepartementet. Forfattaren Vilhelmine Ullmann var mor hans og kvinnesaksforkjemparen Ragna Nielsen syster hans.

Ullmann vart student frå Oslo katedralskule i 1866, og var så i kort tid huslærar på Nes jernverk. I 1872 vart han cand. phil. Det komande året var han i Danmark, der han vitja ulike folkehøgskular. År 1873 oppretta han folkehøgskule i Austre Moland, to år seinare flytta han skulen til Landvik. Frå 1880 dreiv han folkehøgskulen vidare i Seljord, der han arbeidde for ei meir yrkesfagleg innretting av opplæringa. Skulen flytta fyrste åra rundt mellom Drangedal, Vinje og Gjerpen. Frå 1884 hadde skulen fast tilhaldsstad i Seljord, Ullmann kjøpte ein gard med støtte frå bønder i heradet. På skulen heldt han og lærarkurs.

Ullmann var formann i Det Norske Samlaget 1891-94, og var redaktør for avisa Varden. Pedagogikken hans var prega av Grundtvigs ideal der teologi og læring vert oppfatta som ei frivillig akt, og obligatorisk eksaminering er bytta ut med frivillig eigenevaluering av læringsgrad. Han gjorde seg også til talsmann for Henry George sine idear.

Ullmann var styremedlem i Norges venstreforening 1884-1900, leiar av Venstre 1893-94 og 1898-1900. Han var stortingsrepresentant for Bratsberg amt i perioden 1886-1900, i 1893-94 parlamentarisk leiar. Åra 1886-91 var han medlem av kyrkjekomiteen. Han var stortingspresident 1892-94, 1897 og 1898-1900. Frå 1892 til 1900 var han mellom anna formann i budsjettkomiteen og 1898-1900 i valkomiteen. I 1898 var han formann i komiteen «om varetagelse av Stortingets interesser i anledning av Nobels testamente».Lindstøl: 914

Kvindestemmeretsforeningen, leia av Ullmann si syster, Ragna Nielsen, fekk assistanse av Ullmann då foreininga sette fram forslag til endring i grunnlova. Saman med Wollert Konow (SB) var han sentral i Norges Fredslag og stod seinare for etableringa av Stortingets Fredsforening i 1890, og for Fredsbrevet til kongen same året.

I perioden 1902-1910 var han amtmann i Bratsberg amt.

Ullmann døydde sinnssjuk i 1910 i Vestre Aker.

Kjelder

Lindstøl, Tallak: Stortinget og Statsraadet 1814-1914. Kristiania, 1914

Litteratur Fløistad, Ivar: Viggo Ullmann og Folkehøgskolen i Austre Moland 1873-1875 Østvedt, Einar: Viggo Ullmann i Årbok for Telemark 1968

Bakgrunnsstoff

Kategori:Stortingspresidentar Kategori:Stortingsrepresentantar 1886-1888 Kategori:Stortingsrepresentantar 1889-1891 Kategori:Stortingsrepresentantar 1892-1894 Kategori:Stortingsrepresentantar 1895-1897 Kategori:Stortingsrepresentantar 1898-1900 Kategori:Stortingsrepresentantar frå Venstre Kategori:Stortingsrepresentantar for Telemark Kategori:Leiarar for Venstre Kategori:Medlemmar og varamedlemmar i Nobelkomiteen Kategori:Norske amtmenn Kategori:Politikarar frå Oslo Kategori:Målfolk