Fylkesarkiv er ein arkivinstitusjon som er oppretta og vert drifta av ein fylkeskommune. Fylkesarkiv samlar inn og tek vare på arkivmateriale og anna kulturarvmateriale frå fylket. Det er seks fylkesarkiv i Noreg.
Historie Det eldste av dei seks fylkesarkiva er Aust-Agder-arkivet (i dag ein del av Aust-Agder kulturhistoriske senter) som vart oppretta i 1958. Det yngste er Vestfoldarkivet, oppretta i 1997. Dei øvrige fylkesarkiva vart etablert på 1980-og 90-talet: Fylkesarkivet i Sogn og Fjordane i 1986 (prøveordning frå 1983), Hordaland fylkesarkiv i 1991, Fylkesarkivet i Oppland i 1995.
Det er i dag fylkesarkiv i desse fylka: Oppland: Fylkesarkivet i Oppland Nordland: Arkiv i Nordland Sogn og Fjordane: Fylkesarkivet i Sogn og Fjordane Hordaland: Hordaland fylkesarkiv Aust-Agder: Aust-Agder kulturhistoriske senter Vestfold: Vestfoldarkivet
Organisering Fylkesarkiva er oppretta av fylkeskommunane som også er eigarar. Ein fylkesarkivar leiar eit Fylkesarkiv.
Fylkesarkiva er i hovudsak fylkeskommunale institusjonar, som regel underlagt fylkeskommunen si kulturavdeling, men kan og ligge direkte under fylkesrådmannen som i Oppland. I Aust-Agder og Vestfold er fylkesarkiva slått saman med musea og er organisert som interkommunale selskap, med fylkeskommunen som største eigar.
Fylkeskommunar som ikkje har oppretta eigne fylkesarkiv, er som regel medlem av eit interkommunalt arkiv (IKA) som tek seg av fylkeskommunen sine lovpålagte depotoppgåver.
Oppgåver Fylkesarkiva arbeider breitt på arkivfeltet. Dei er for det første depotinstitusjonar for fylkeskommunane, og tek seg av fylkeskommunane sine lovpålagte depotoppgåver som spesifisert i Arkivlova. Fylkesarkiva oppbevarar dei eldre arkiva etter fylkeskommunane sine sentraladministrasjonar og eksterne verksemder som vidaregåande skular. Fylkesarkiva oppbevarer også arkiv etter institusjonar som fylkeskommunen tidlegare har hatt ansvar for, som barnevernsinstitusjonar, rusomsorgsinstitusjonar, heimar for psykisk utviklingshemma osb.
Dei fleste fylkesarkiva jobbar også aktivt med privatarkiv frå sitt fylke, som til dømes arkiv etter bedrifter, organisasjonar og privatpersonar. I tillegg jobbar dei ofte med foto, film, lyd, stadnamn, folkemusikk, minnemateriale m.m. Fylkesarkiv driv aktiv formidling av arkiv og historie med utgangspunkt i institusjonen sine samlingar.
Fleire av fylkesarkiva har ei kommunearkivordning (interkommunalt arkiv), og er difor depotinstitusjon for kommunane i sitt fylke. Dei fleste fylkesarkiva driv og med aktiv rådgjeving innanfor arkivdanning.
Kjelder Denne artikkelen bygger på «Fylkesarkiv» frå , den 27. november 2013.
Bakgrunnsstoff Heimeside for Arkiv i Nordland Heimeside for Aust-Agder kulturhistoriske senter Heimeside for Hordaland fylkesarkiv Heimeside for Fylkesarkivet i Oppland Heimeside for Fylkesarkivet i Sogn og Fjordane Heimeside for Vestfoldarkivet Lov om arkiv av 4. desember 1992, med forskrifter
Kategori:Arkiv i Noreg